ROXAS CITY – Masuwerte nga naluwas sa pagpameke sang kuwarta ang isa ka manugbaligya sang utan sa Burgos Talipapa.
Sa interview sang Bombo Radyo kay Manang “Bebeng” ginpahayag sini nga maayo lamang bangud nahibaluan sini nga peke ang P500 paper bill nga ginbayad sang isa ka babayi sa iya.
Suno diri, nagabalor sang P200 nga utan ang ginbakal sang wala makilala nga babayi kag sang tuyo na sini nga sensilyuhan sang P300, natalupangdan sini nga peke ang ginbayad nga kuwarta sang customer, pinaagi sa pagpasilang sa silak sang adlaw kag wala ang iban nga features sini.
Bangud diri, ginprangka niya ang babayi nga peke ang kuwarta kag ginkatingala nga wala man lang nagpangakig ang babayi kag gilayon nagbiya.
Mensahe sini sa mga kaangay vendor nga mangin maaligmat sa sini nga modus ilabi na kun wala sang money detector, bangud makaluluoy sila kun mabiktima sang mga nagapameke sang kuwarta.
