Gintupok sang kalayo ang duha ka puluy-an sa nagluntad nga sunog sa takna alas-2:00 kaina sang kaaganhon sa Sitio Manaba, Barangay Matagnop, Dao, Capiz.
Ginkilala ang mag-iloy nga gapanag-iya sang amo nga mga puluy-an kanday Jonatan Bejar, tag-iya sang ginapahayag nga totally burned ang balay nga human sa light materials kag Catalina Bejar, ang tag-iya sang partially burned nga balay nga human naman sa concrete materials.
Sa interview sang Bombo Radyo kay SFO1 Geovy Fuentes, sang BFP-Dao, ginpahayag sini nga personal nga nagpadulong sa ila nga talatapan ang isa ka persona agud mangayo sang bulig bangud may nagluntad nga sunog sa nasambit nga lugar nga gilayon naman nila nga ginrespondehan.
Dugang pa ni Fuentes, ang balay ni Jonathan Bejar ang una nga gitunaan sang sunog nga kun sa diin wala sang tawo bangud wala ini nagtulog sa iya balay kag sa balay ini sang iya nga iloy nga si Catalina nagtulog sang nagluntad ang amo nga sunog.
Gindeklarar naman nga fire out takna alas-3:20 sang kaaganhon.
Nagdangat naman sa ginabulubanta nga kapin P54,000 ang balor sang nangin kahalitan sa nasambit nga insidente.
Sa karon, wala pa matul-id kun anu ang gintunaan sang sunog kag padayon pa ang imbestigasyon sang mga otoridad angut sa nasambit nga sunog.
