ROXAS CITY – Ginalauman ang pagtambong sang madamo nga mga deboto sa tuigan nga Pasyon ni Kristo sa palaabuton nga Huwebes Santo Abril 18, 2019 sa banwa sang President Roxas, Capiz.
Ginpahayag ni Mr. Gaspar Managuit, direktor sang Pasyon play nga daku nga paghangkat sa iya bilang bag-o nga direktor ang pagpanguna sa tuigan nga hilikuton nga ginatambungan indi lamang sang mga deboto nga Pilipino kag katoliko kundi kalakip man sang mga turista.
Nahibaluan nga may yara lamang sila sang tatlo ka bulan nga preparasyon sa karon nga Pasyon play, apang ginpasalamatan ang suporta sang cast nga naghatag man sang ila tiyempo kag kooperasyon para sa ila nga practice.
Pila sa mga nagauyat sa papel sang importante nga karakter sa Pasyon play amo sanday Mario Garovillo bilang si Hesu Kristo, Jonell Edward Tipon bilang si Caifas, Richard Boluco bilang si Pedro, Ms, Renilba Simpasim bilang si Mary Magdalene, wardrobe designer kag in-charge sa costume nga si Mrs. Nerissa Cabales kag assistant director nga si Emilio Cabales.
Himoon ang 1st part sang Pasyon play sa Civic center sang President Roxas kag ipadayon ang 2nd part sa Sitio Boac cemetery, sa diin patigayunon ang pagtaltal.
