Una nga adlaw sang pagboto sa Conclave, napaslawan sa pagpili sang bag-o nga Santo Papa

Wala pa sang may napilian nga bag-o nga Santo Papa ang mga cardinal sa una nga adlaw sang Conclave voting.

Ini matapos nagwa ang itom nga aso sa chimney sang Sistine Chapel sa Vatican las 9:00 sa gab-i, oras sa Rome ukon las 3:00 sa kaagahon, oras sa Pilipinas.

Patimaan ang itom nga aso nga wala nalab-ot sang conclave ang two-thirds majority sa first ballot.

Bangud wala nakuha ang 89 votes, magapahuway anay ang mga cardinals sa ila residences sa Vatican kag magaboto naman liwat sa bwas.

Nahibaluan nga ang College of Cardinals ang ginabug-usan sang ka mga 133 cardinal electors.