Ginkumpirmar na sang Bureau of Animal Industry ang una nga kaso sang “Q Fever” sa pungsod.
Ang nasambit nga balatian, ang nagakaapekto sa baka, karnero kag kanding, ang mahimo nga magasaylo sa tawo pinaaagi sa paghaklo sang ginlatnan nga yab-ok.
Suno kay Dr. Christian Daquigan, officer-in-charge sang National Veterinary Quarantine Services Division sang BAI, ang kalabanan sa mga kanding nga nagpositibo sa nasambit nga balatian yara sa Santa Cruz, Marinduque.
Sandig sa National Institutes of Health (NIH), ang Q fever, isa ka balatian nga bacterial pathogen Coxiella burnetii. Pila ka mga sintomas sini sa tawo amo ang pagpalangurog, hilanat, pagpalanakit sang kaluwasan kag kun indi ini matalupangdan, mahimo ini nga magka-komplikasyon sa atay ukon sa taguipusuon.
Sa karon, wala pa sang gin-kumpirma nga kaso sang q fever sa tawo. Apang, hugot naman nga gina-tutukan sang Bureau of Animal Industry ang mga tikang agud mapunggan ang paglapta sang nasambit nga balatian.
Na-depopulate na man ang 5 ka dosena nga infected nga kanding nagikan sa United States kag nagapadayon pa ang tracing sa mga potentially infected animals.
Luwas diri, nagapakigbahin na ang BAI sa Local Government Unit (LGU) para sa dugang nga mga aksyon sa Marinduque agud masigurado ang tsakto kag timely testing sa mga ginaalegar pa nga kaso.
Samtang, matapos mabaton ang resulta sang PCR test, gilayon man nga gin-manduan ni Agriculture Secretary Francisco P. Tiu Laurel, Jr., ang tracing sa mga potensyal nga nalapnan nga kasapatan kag temporaryo man nga ginbawal ang pag-import sang mga kanding nagikan sa US.
Gin-manduan man sini ang preventive suspension sang pila ka mga tawo sang BAI samtang ginapasaka ang pag-repaso sa BAI’s quarantine kag disease control protocol, kag potensyal nga blacklisting sang importer sang mga infected nga kanding.
Ginasiguro man sang Department of Agriculture sa pumuluyo sang Sta. Cruz, Marinduque nga tanan nga mga kinahanglanon nga bulig para mapunggan ang paglapta sang nasambit nga balatian, ihatag sang ahensya.
