ROXAS CITY – Ginpatpat sang Chairman sang Committee on Education ang status sang scholarship program sang Capiz Provincial Government.
Sa interview sang Bombo Radyo Kay Board Member Thea Faith Reyes, gintuad sini nga may yara na sa karon sang masobra 4,700 nga mga scholars ang probinsya kun sa diin 3,621 ang mga old scholars kag 1,160 naman ang mga bag-o nga scholars para sa school year 2023-2024.
Ginklaro man sini nga pag-abot sa issue sang 256 ka mga scholars nga ginpangkakas sa programa bangud sa paglapas sa scholarship ordinance, 184 diri ang ginhatagan sang tsansa ukon gin-reinstate matapos nga ila man nga ginsabat ang mga ginpadala sa ila nga sulat sang scholarship secretariat kun sa diin 142 diri ang nag-eksplekar nga wala sila makahibalo nga bawal na magbaton sang iban pa nga educational financial assistance ukon ayuda nagikan sa iban pa nga ahensya sang gobyerno ukon partylist samtang ang 42 naman ang nagpasa sang affidavit after oath sa abogado nga ginaklaro nga apisar ara ang ila mga ngalan sa listahan sang nahatagan sang ayuda nagikan sa isa ka partylist ukon ahensya sang gobyerno, wala sila sang may nabaton nga kwarta ukon ayuda.
Ginkasubo naman ni Reyes nga ang nabilin nga 72 ang dalayon na nga ginkakas sa scholarship program bangud napaslawan ang mga ini nga magsabat sa mga ginpadala sa ila nga sulat sang scholarship secretariat para kuntani sa ila mangin eksplenasyon.
Nagalaum naman ang nasambit nga opisyal nga wala na sang magalapas pa sa scholarship ordinance sang probinsya agud nga wala na sang may madula pa sa listahan kag padayon nga mabuligan sang nasambit nga programa.
Panugyan naman ni Reyes ang mga scholars nga halungan ang prebelihiyo nga ginhatag sang gobyerno probinsyal sa ila sa pagpanguna ni Gov. Fredenil Castro pinaagi sa pagtu-on sang maayo kag pagtutom sa ila pag-eskwela.
