Nagalala nga isyu sa krisis sa Middle east ang sa una kag ulihi nga US Vice Presidential debate sa tunga nanday Democrat Tim Walz kag Republican JD Vance sang Martes, Oktubre 1 (oras sa Amerika).
Ginpamangkot ang duha ka VP candidates kun pagasuportahan ukon pagatutulan sang mga ini ang pre-emptive strike sang Israel batuk sa Iran nga ginakabig sang US nga pinakadako nga state’s sponsor sang terorismo sa bulong nga kalibutan kag may kapasidad nga maghimo sang nuclear weapons sa sulod lamang sang isa ukon 2 ka semana.
Una nga nagsabat si Minnesota Gov. Walz, running mate ni VP Kamala Harris, kun sa diin ginpunto sini nga kinahanglan sang Amerika nga magka-presensiya sa Middle east. Ginmensyunar man ni Walz ang October 7 massacre sa northern Israel kun sa diin ginsiling sini nga kinahanglan nga magka-steady leadership kag nakita nya suno diri ini sa idalom sang pagpamuno ni VP Kamala Harris.
Sa bahin naman ni Ohio Sen. Vance, running mate ni ex-Pres. Donald Trump, nakadepende suno diri sa Israel ang desisyon kun luyag sang mga ini nga mag-lunsyar sang preemptive strike sa Iran kasunod sang gin-lunsyar sini nga missiles sa Israel sang tinalikdan nga Martes.
Maluwas diri, nagbayluhanay man sang ginapatihan ang 2 tuhoy sa climate change sa tunga sang pagpanglaslas sang Hurricane Helene sa Amerika. Suno kay Vance, ang halit nga tuga sang hurricane ang isa ka unbelievable unspeakable human tragedy apang wala naman sini direkta nga ginsabat ang pamangkot angut sa epekto sang climate change.
Gintalupangod naman ni Walz ang ginhimo nga improvements ni VP Harris sa climate change kag ginpanginwala ang nakaligad nga komento ni Donald Trump nga isa ka “hoax” lamang ang nasambit nga isyu.
Pila pa sa gintalakay sang 2 ang natuhoy sa ekonomiya sang Amerika kag immigration policies.
