ROXAS CITY – Dako ang kaperdihan sang isa sa mga manugbaligya sang isda, matapos sila nga ginsaylo sang puwesto sa Teodoro Arcenas Trade Center (TATC) nagikan sa Burgos Talipapa.
Sa interview sang Bombo Radyo kay Nanay Neneng, ginpahayag sini nga tuman ka tumal ang ila nga benta sumugod nga ginsaylo sila sa bag-o nga pwesto bangud suno diri nga malaka lamang ang nagasulod sa merkado indi kaangay sa una nila nga puwesto nga madamo ang bumalakal.
Suno diri, kung sang una hapon lamang ang iya pagbaligya subong nagasugod na ini nga magplastar sa aga tubtob sa hapon apang sa pihak sini, indi sa gihapon ini maubos.
Mahibaluan nga sadto nagakaubos sang 2 ka banyera nga isda apang sa karun ahat na lamang nga maubos ang 1 ka banyera kag masami nga nagalab-ot lang sa 1-2 ka balde.
Dugang pa sini nga wala siya nagapangita sang maanyag nga puwesto kundi apisar nga sa simple lamang kag maubos ang iya baligya dako na ini nga bulig sa iya kag pamilya.
