Vendor sang Ivisan, Capiz, nagapangayo sang bulig pinansyal sa gobyerno matapos mabasa ang 60 ka sako sang bugas

Ivisan, Capiz – Nagapanawagan sang bulig sa gobyerno ang negosyante sang bugas kasunod sang lapnagon nga baha nga nagluntad sa probinsya sang Capiz.

Sa interview sang Bombo Radyo kay Layline Atienza, vendor sa Ivisan Public Market, iya ginpahayag nga ginabanta 60 ka sako sang iya ginabaligya nga bugas ang lunsay nabasa .

Suno kay Atienza, nagalibog ang iya ulo kun sa diin makuha sang inug bayad sa 60 ka sako sang bugas bangud consignment lamang ini.

Gintinguhaan pa niya nga mabaligya ang basa nga bugas sa manubo nga presyo apang wala gid sang may nagabakal rason nga ginhatag na lang niya ini.

Kuntani pahayag sang natungdan nga mabalikdan man sila sang gobyerno kag mahatagan sang financial assistance bangud apektado ang ila palangabuhian.