Naghingyo si Vice President Sara Duterte sa Korte Suprema nga temporaryo nga untaton ang nagapadayon nga impeachment proceedings batuk sa iya .
Sa ginpasa nga petisyon, ginhingyo ni Duterte ang pag-issue sang temporary restraining order (TRO) agud mapa-untat ang hearing sang House Justice Committee.
Ginpanindugan sini nga indi husto ang proseso kag dapat ideklarar nga null and void.
Suno sa Bise Presidente, nagalapaw ang otoridad sang House committee bangud daw kaangay nga nagapatigayon ini sang “mini-trial,” samtang suno sa iya, ang Senado lamang ang may mandato sa pagpatigayon sang impeachment proceedings.
Ginpanindugan man sini nga wala siya ginhatagan sang nagakaigo nga due process agud depensahan ang iya kaugalingon.
Nahibaluan nga kalakip sa mga alegasyon batok kay Duterte amo ang ginaalegar misuse of confidential funds, inproper declaration of assets, abuse of power, kag ginaalegar pagpamahog kay Presidente Ferdinand Marcos Jr.
Apang suno sa Bise Presidente, ang mga ini ang base lamang sa espekulasyon kag indi bastante agud makabig nga impeachable offenses.
Samtang, ginpamatukan naman sang pila ka mga mamalidha ang mga alegasyon ni Duterte.
Suno sa ila, nag-agi sa insakto nga proseso ang pag-refer sang mga reklamo sa impeachment kag nagasanto sa Konstitusyon kag mga pagsulundan.
Sa subong, ginahulat pa ang desisyon sang Korte Suprema kon bala ihatag ang hingyo ni Duterte nga untaton ang impeachment proceedings ukon pahanugutan nga magpadayon.
