IVISAN, CAPIZ- Masinadyahon kag halos permi lang malipayon ang vlogger nga nalumos-patay kadungan sang mabaskog nga pag-ilig sang tubig-baha sa Barangay Malocloc Sur, Ivisan, Capiz nga dala sang Bagyo Ramil.
Ang nasambit nga vlogger amo si Mary Mae Urdelas, 22-anyos kag residente sang nasambit nga lugar.
Sa interview sang Bombo Radyo kay Edwin Urdelas, utod sang biktima, iya ginpahayag nga halos wala sang ginaproblema ang iya nga manghod bangud nga permi lang ini masinadyahon.
Suno kay Edwin, ang iya nga manghod ang isa man ka mabuot nga bata.
Pahayag nya, amo man ini ang nagabulig sa ila nga Iloy, sa diin nga naga-ubra ini sa isa ka canteen agud nga mabuligan ang kinahanglanon sang ila nga pang-adlaw-adlaw.
Wala ginalauman ni Edwin, nga amo na gali adto ang ulihi nga tion nga magsugat sya sa iya nga manghod.
Sa subong, nagapabilin ang bangkay sang biktima sa isa ka punerarya sa nasambit nga banwa samtang nagapadayon sa pagpakabakod ang iya sini nga pamilya.
Interviewed by Bombo Jessa Mae Siman De Los Santos
