Ginbuyagyag ni anay Senator Antonio Trillanes IV ang posibilidad nga pasakaan sang kaso nga plunder complaint si VP Sara Duterte.
Suno kay Trillanes, halin lamang sa isa ka informant ang iya nabaton nga impormasyon, kag posible nga subong nga semana mapasaka na sa Office of the Ombudsman ang nasambit nga kaso.
Dugang pa niya, posible nga sa buwas nga adlaw pormal na ini nga mapasa sa Tanodbayan.
Ang reklamo ang may kaangtanan sa gihapon sa ginaalegar maanomaliya nga paggamit ni VP Sara sang iya confidential kag intelligence fund, lakip ang iban pa nga mayor nga isyu sa Department of Education kag Office of the Vice President.
Sa subong, wala pa ginbuyagyag sang anay senador kon ano nga grupo ukon sin-o ang magapasaka sang kaso batuk sa bise presidente.
Matandaan nga ang verified impeachment complaint batuk kay VP Sara nga naka-archive subong sa Senado, ang isyu sang maanomaliya nga paggamit sang confidential kag intelligence fund sa rason sang graft kag corruption ang nalakip bilang basehan sang reklamo.
