ROXAS CITY, CAPIZ – Ginaduso sang Department of Trade and Industry (DTI) ang Western Visayas bilang destinasyon para sa Healthcare Technology Services.
Sa interview sang Bombo Radyo Roxas kay Rachel Nufable, Regional Director sang DTI Region 6, iya ginpahayag nga maathag nga ang Western Visayas preparado na nga makigsabayan sa pang kalibutanon nga merkado.
Suno kay Nufable, target sang rehiyon nga mangin nagapanguna nga destinasyon para sa Healthcare Information Management Services.
Ginhiwat sang Hunyo 25 tubtob 26 ang isa ka daku nga pagtilipon nga gintambungan sang mga eksperto sa industriya, mga negosyante, mga manunudlo, kag mga representante sang gobyerno agud talakayon ang nagkalain-lain nga pagpanghangkat sa sektor sang HIMS. Lakip diri ang epekto sang Artificial Intelligence kag ang mga pamahog sa cybersecurity.
Dugang pa sang natungdan, importante nga atubangon ang ini nga mga pagpanghangkat bangud magluwas sa inobasyon, ang HIMS may potensyal man nga makahatag sang linibo nga trabaho nga mataas ang kantidad para sa mga pumuluyo sang rehiyon.
Gindayaw naman ni DTI Assistant Secretary Leonila Baluyut ang mapag-on nga koneksyon kag pagbinuligay sang nagkalain-lain nga sektor sa Western Visayas para maduso ang ila nga roadmap padulong sa mangin nagapanguna nga HIMS destination sa pungsod.
Bilang kabahin sang inisyatiba, nagpirma sa isa ka Memorandum of Agreement ang DTI kaupod ang Department of Education Region 6, Technical Education and Skills Development Authority (TESDA), National ICT Confederation of the Philippines (NICP), kag Healthcare Information Management Association of the Philippines (HIMAP).
Tinutuyo sang kasugtanan nga pasanyugon kag iduso ang Healthcare Information Management Services pinaagi sa skills development, curriculum alignment, industry exposure, kag digital innovation.
– Interviewed by: Bombo Lynd-C Bade
