Suspendido na ang lisensya sang online content creator nga si Yanna Motovlog matapos ang ginkaulamiran sini nga road rage sa Zambales nga nag-viral online.
Suno sa Land Transportation Office (LTO), ginpamulta si Yanna sang P5,000 bangud sa paggamit sang motorsiklo sang wala sang side mirror kag P2,000 para sa reckless driving.
Suno sa desisyon sang LTO, magapabilin nga suspendido ang lisensya ni Yanna kun indi niya pag-surrender ang motorsiklo nga iya gingamit sa insidente, nga sang ulihi iya gin-ako nga indi siya ang tag-iya.
Pahayag pa sang LTO nga wala man nagsunod sim Yanna Motovlog sa mga pagsulundan sang LTO, kasubong sang wala sini pagtambong sa imbestigasyon kag wala pagsumiter sang motorsiklo agud inspeksyunon, gani nangin rason ini sang dugang nga penalidad kag suspension sang lisensya sang motorsiklo. Gindumilian man ini nga magmaneho samtang suspendido ang iya nga lisensya.
Matandaan nga matapos ang insidente, nagpangayo sang pasaylo si Yanna Motovlog sa driver sang pickup truck nga iya nakabais kag sa riding community. Sa isa ka follow-up video, nagpadulong siya kag ang iya nga utod sa lugar nga ginatrabahuan sang driver agud mag-apologize sang personal, apang wala nila ini nakita sa lugar.
Paandam sang LTO sa moto-vlogger nga padayon ini nga dakpon kun magmaneho siya sa karsada samtang suspended ang iya nga lisensya.
