ROXAS CITY – Dakop ang 10 tanan ka persona matapos ginkasahan sang drug buy bust operation sang gintingob nga puwersa sang SDET- Roxas City, PDEA- Capiz, Aklan, kag Guimaras sa bahin sang Railway St., Barangay Punta Tabuc, Roxas City mga alas 2:00 kahapon sang hapon.
Ginkilala ang mga nagkaladakpan nga sanday Frederick Besa Dellota, 25-anyos, residente sang Poblacion Ilaya, Panitan, Gil Severo Ojera, 52-anyos, Fernando Laureano Ojera, 61-anyos, Joel Limboy Baso, 44-anyos lunsay residente sang Brgy. San Jose, Roxas City, Nicole Aldea Villanueva, 19-anyos, residente sang Inzo Arnaldo, Roxas City, Jason Barbasa Datiles, 45-anyos, residente sang Brgy. Banica, Roxas City, Ramie Develos Fuentes, 28-anyos kag residente sang Pob. Ilawod banwa sang Panitan, 15-anyos nga lalaki, Jolly Altamia Delos Reyes, 56-anyos, Ruel Espiritu Valencia, 53-anyos lunsay residente sang Barangay 9 sining syudad.
Ginapahayag target person amu si Ruel Espiritu Valencia, isa ka barangay tanod sa lugar sang insidente.
Nakuha sa posesyon sang nagkaladakpan ang 8 ka sachet sang ginaalegar shabu kag iban pa nga drug paraphernalia.
Mas o menus 13 gramo ang kabug-aton sang nakuha nga suspected shabu kag ginabulubanta mas o menus P91,000 ang street value sini.
Magapangatubang sang panumbungon nga paglapas sa RA 9165 ukon “Comprehensive Dangerous Drugs Act of 2002” ang nasambit nga mga persona.
Sa karon, yara sa paghinakop sang Roxas Component City Police Station ang mga nagkaladakpan.
