ROXAS CITY – 12 sa 16 ka mga alkalde sa kabanwahanan ang nagpirma sa resolusyon nga nagaduso nga mapahalin sa Capiz Provincial Health Office si Dr. Leah del Rosario bilang Officer-in-Charge (OIC).
Mahibaluan nga ang nasambit nga resolusyon ang ginsumiter sang League of the Municipalities in the Philippines (LMP) Capiz Chapter kay Governor Esteban Evan ‘Nonoy’ Contreras sa gintambungan nga sinapol sang mga alkalde.
Mahibaluan nga kalakip sa apat ka mga alkalde sa kabanwahanan nga wala nagpirma sa amo nga resolusyon amo ang sa mga banwa sang Pilar, President Roxas, Dao kag Panay.
Mahibaluan nga luyag pahalinon sang grupo sang mga alkalde si Del Rosario bangud sa ginapahayag ‘poor performance’ sang amo nga opisyal.
Gin-athag naman sang gobernador nga hinalaan pa sang Provincial Inter-Agency Task Force (IATF) ang ginaapelar sang mga alkalde.
Ginklaro man ni Contreras nga wala man ini sang reklamo natuhoy sa trabaho sang amo nga opisyal apang may yara ini sang tatlo ka mga doktor nga ginapanan-aw nga posible magtal-us kay Del Rosario.
Nahibaluan nga si Del Rosario ang temporaryo nga wala naga-duty kasunod sang pag-file sini sang sick leave.
