PONTEVEDRA, CAPIZ – Nagapabilin nga kritikal sa magkatuhay nga ospital sa syudad sang Roxas ang duha ka mga ginang nga ginbuno kag ginlabo sang 14 anyos nga solterito sa Sitio Sta. Ana, Barangay Binuntucan, Pontevedra, Capiz.
Suno kay PEMS Ronald Amador, public information officer sang Pontevedra PNP nga lunsay yara sa Intensive Care Unit ukon ICU sa ospital sa syudad ang mga biktima nga sanday Helen Opina 50-anyos kag Analyn Cintos 42-anyos.
Ginpahayag ni Amador nga lunsay nakaangkon sang madamo nga pilas sa nagkalain-lain nga porsyon sang lawas ang duha ka mga biktima.
Nagaguha sa imbestigasyon sang mga kapulisan nga pagpangawat ang motibo sang suspek sa krimen.
Ginapatihan nga posible espading kag gunting ang ginamit ni alyas Jordan sa pagbuno kag paglabo sa mga biktima.
Samtang, yara na sa kustodiya sang Pontevedra Municipal Police Station ang suspek .
Suno naman kay Police Staff Sergeant Rhea Batuigas sang Pontevedra PNP nga ginturn-over sa ila sang mga opisyales sang Barangay Binuntucan ang suspek nga si alyas Jordan matapos nga nakumbinsi sang iya ginikanan nga magsungka.
Ginkumpirmar ni Batuigas nga una na nagpalagyo kag nagpanago ang suspek sa mga himata sini sa Barangay Cabug-Cabug, Pres. Roxas matapos ang krimen.
Sa karon, yara na sa Women and Children’s Protection Desks (WCPD) section ang suspek kag natalana nga igaturn-over sa Department of Social Welfare and Development (DSWD).
