Gin-aresto ang Disi-syete (17) ka mga tawo kag pagapasakaan sang kaso matapos gin-alegar naghaboy sang bato kag nagsunog sang trailer truck sa tunga sang protesta batok sa korapsyon sa Mendiola, Manila kahapon nga adlaw.
Ang mga nadakpan yara na sa kustodiya sang Manila Police District (MPD).
Ginpanindugan sang Philippine National Police nga respetuhon ang kinamatarong sang mga pumuluyo nga magpahayag sang ila kaugalingon, apang nagpanawagan sang kalinong kag paglikaw sa kalakasan.
Dugang pa sang kapulisan nga magapabilin sila nga committed sa maximum tolerance, apang magahimo sila sang aksyon batok sa sin-o man nga makahalit ukon makaguba sang propedad.
Samtang, ginmanduan man ni Manila Mayor Francisco “Isko Moreno” Domagoso ang Manila Police District (MPD) nga hugot nga ipatuman ang curfew para sa mga menor de edad matapos ang bayolente nga hublag-protesta.
Tinutuyo sang amo nga kasuguan nga mapabilin ang kalinong kag masiguro ang kaluwasan sang mga pamatan-on, ilabi na kon may yara sang dalagku nga pagtililipon ukon protesta.
Nahibaluan nga hublag-protesta gintambungan sang mga ordinaryo nga pumuluyo, kag pila ka mga personalidad sa showbiz bilang panawagan nga manabat ang mga korap nga opisyal sang gobyerno, ilabi na may kaangtanan sa korapsyon sa mga flood control project.
Ginhiwat ang mga pagtililipon sa Rizal Park (Luneta), Mendiola, kag EDSA Shrine, kadungan sang anibersaryo sang deklarasyon sang Martial Law sa panahon ni anay Presidente Ferdinand E. Marcos Sr.
