ROXAS CITY – Gindakop sang mga katapo sang kapulisan ang 18-anyos nga lalaki bangud sa paglapas sa Comelec Gun Ban matapos nga naaktuhan ini nga may bitbit nga kutsilyo samtang yara sa Paseo del Rio, Barangay VIII, sini nga syudad.
Ginkilala ang nadakpan kay Paulo Apostol, construction worker kag residente sang Barangay Dinginan, Roxas City.
Sandig sa inisyal nga impormasyon nagikan sa Roxas City PNP, nga alas-10:30 kagab-i sang Domingo sang nasiplatan si Apostol nga may bitbit nga kutsilyo nga may kahabaon sa 14 ka pulgada.
Gilayon man ini nga ginpaaresto sa mga kapulisan kag ginpaintindi sang iya nakumiter nga paglapas sa Comelec Resolution No. 10728 ukon pagdala sang tanan nga iligal nga sahi sang armas ukon deadly weapons magluwas sa mga otorisado nga persona sa idalom sang Comelec Gun Ban.
Sa karon yara ini sa kustodiya sa Roxas City PNP para sa nagakaigo nga disposisyon.
