Natalana nga i-export ang $2 billion nga balor sang langis sang Venezuela sa Amerika.
Ini matapos nga nagkasugtanay ang Estados Unidos kag Venezuela sang nasambit nga bagay.
Ginakabig ni US President Donald Trump ang kaangay nga kasugtanan bilang isa ka flagship negosasyon agud i-divert ang supply sang langis gikan sa China samtang suno sa iya makabulig ini sa Venezuela agud malikawan ang mas grabe nga pagbuhin sang produksyon sang langis.
Matandaan, ang Venezuela may yara sang minilyon ka bariles sang langis sa mga tanker kag ginatago sa mga tangke nga indi na madala bangud sa pagbalabag sa mga export nga ginpatuman ni Trump humalin sang tunga-tunga sang Disyembre.
Ang nasambit nga blockade ang kabahin sang tuman nga pressure sang US sa gobyerno ni Venezuela President Nicolas Maduro nga nagresulta sa pagkadakop sini sang nagligad nga semana.
Sa isa ka post, ginpahayag ni Trump nga ang Venezuela magahatag sang 30 milyon tubtob 50 milyonka bariles sang sanctioned oil sa US.
Dugang pa ni Trump, ang amo nga mga langis igabaligya sa ila market price, kag ang kuwarta nga matipon gikan diri pagakontrolon sang Presidente sang Estados Unidos agud masiguro nga ini magamit para sa kaayuhan sa mga pumuluyo sang Venezuela kag Amerika.
Pahayag pa ni Trump, si US Energy Secretary Christ Wright, amo ang responsable sa pagpatuman sang kasugtanan kag ang langis ang igabayhe sang mga barko direkta sa mga pantalan sang Amerika.
