Ginahikot na sa karon sang pamilya sang biktima ang mga dokumento nga iga-file nga kaso batuk sa duha ka driver suspects nga aksidente nga nabungguan ang ginasakyan nga tricycle sang mag iloy sa national Highway sang Barangay, Bitoon, Ilaya, Cuartero, Capiz.
Sa interview sang Bombo Radyo kay PCPT Alladen Talaban, hepe sang Cuartero MPS, ginpahayag nga desidido ang pamilya sang mga biktima nga magpasaka sang kaso.
Samtang, sa karon temporaryo nga ginhilway sang Cuartero PNP ang mga driver suspect matapos nagtakup ang reglementary period of detention sang mga ini.
Matandaan nga ginbawian sang kabuhi ang mag-iloy nga pasahero sang tricycle matapos aksidente nga nabungguan sang isa ka salakyan ang ginsakyan nga traysikol sang mag-iloy. Ginkilala ang driver sang traysikol kay alyas Leomar, 22-anyos, samtang ginkilala naman ang sakay sini nga sanday alyas Ivy, 20-anyos, live-in partner sang driver kag alyas Chalea, 2-month-old, bata sang driver nga lunsay mga residente sang Barangay, Bitoon, Ilaya, Cuartero, Capiz.
Ang driver naman sang salakyan nga nakabunggo sa nasambit nga tricycle kay alyas Clyde, 24-anyos, residente sang Brgy. Salvation Habog Habog, Molo, Iloilo City. Ginkilala naman ang driver sang isa pa ka salakyan nga na-imbolbado kay alyas Ben, 46-anyos, isa ka businessman kag residente sang Brgy. Mongpong, Roxas City.
Nag-angkon sang pilas sa lawas ang mag-iloy nga pasahero sang traysikol nga gilayon naman nga ginrespondehan sang Cuartero Emergency Response Unit kag ginpadangat sa Dao District hospital para kuntani sa nagakaigo nga pagbulong apang wala nagdugay ginbawian ang mga ini sang kabuhi.
Magapangatubang sa kaso nga “Reckless Imprudence Resulting to Multiple Homicide and Damage to Property ang amo nga mga driver sang duha ka salakyan.
