ROXAS CITY – Arestado ang duha ka mga kalalakinhan matapos nga akto nga nagahampang sang Cara y Cruz ukon ‘Tumbo’ sa Barangay Punta Cogon, Roxas City.
Ginkilala ang mga nadakpan nga sanday Crisanto Bosales, 48-anyos kag ang SK Chairman nga si Kirby Contenido, 24-anyos, lunsay mga residente sang nasambit nga barangay.
Sandig sa impormasyon nagikan sa mga katapo sang Roxas City PNP, ginkasa ang operasyon alas-10:45 kagab-i sang Sabado, Marso 12, kun sa diin akto nga nadakpan ang nasambit nga mga persona nga nagapatigayon sang iligal nga pagsugal.
Nakuha sa kontrol kag posesyon sang duha ang P1,000 nga kuwarta sa nagkalain-lain nga denominasyon kag gambling paraphernalia.Ginlapas sang mga ini ang Presidential Decree 1602 ukon ‘Prescribing Stiffer Penalties on Illegal Gambling.’
Sa karon, nakahunong ang mga ini sa karsel sang Roxas City PNP para sa nagakaigo nga disposisyon.
