ROXAS CITY – Yara na sa kostodiya sang pulisya ang duha ka menor de edad nga nagserbe nga driver sang motorsiklo nga gingamit sa serye sang mga hold-up incident sa tatlo ka lugar sa Roxas City.
Suno kay Superintendent Dante Tayco, hepe sang Roxas City PNP, gin-imbitahan sang pulisya ang duha ka menor de edad sang nagguwa sa ila pag-usisa nga may kahilabtanan sa serye sang mga hold up incident kag gin-updan pa ang mga ini sang ila mga ginikanan.
Lipod sa ihibalo sang duha nga ginpatawag man sa police station ang mga biktima nga positibo nga nagtudlo sa mga suspek nga sila ang naghold-up sa ila.
Nagbakud pa ang testimoniya sang mga biktima, matapos akuon sang duha ang nangin partisipasyon sa mga hold up incident.
Magluwas diri narekober sa posesyon sang mga suspek ang mga cellphones kag pila ka mga kagamitan sang mga biktima.
Samtang padayun nga ginpangita sang mga pulis ang nagaserbe nga striker nga ba-se sa impormasyon madamo sang rekord kag nabilanggo na man bangud sa iligal nga aktibidad.
