PONTEVEDRA, CAPIZ – Patay ang isa ka 20-anyos nga lalaki matapos nagbunggo ang iya ginamaneho nga motorsiklo sa nakapark nga salakyan sa Sitio Kalye 13, Barangay Bailan, Pontevedra, Capiz.
Ang napatay amo si alyas “Nonoy,” kag residente sang Sitio Pangayawan, Barangay Tacas, Pontevedra.
Sandig sa impormasyon nga nakuha sang Bombo Radyo sa Pontevedra Municipal Police Station, nagabyahe ang biktima gikan sa ila puluy-an pakadtu kuntani sa syudad sang Roxas apang nadulaan ini sang kontrol kag nagbunggo sa isa ka salakyan nga naka-park sa kilid sang dalan.
Gintinguhaan pa nga dal-on sa Bailan District Hospital ang biktima apang ginbawi-an sang kabuhi bangud sa patal nga pilas sa lawas.
Sa subong, nagapadayon pa ang imbestigasyon sang mga otoridad para sa husto nga disposisyon.
