ROXAS CITY – Nag-abot na sa pungsod ang 21 ka tripulante nga Pinoy nga nakaluwas sa pagpangbomba sang Houthi rebels sa ginasakyan nga MV Tutor Vessel sa Red Sea.
Sakay sang Gulf Air flight GF154 nagikan sa Manama, Bahrain ang 21 nga tripulante kag naghugpa sa pungsod alas 11:10 kaina sang aga.
Mainit nga ginsug-alaw sang Department of Migrant Workers (DMW) sa pagpanguna ni DMW Sec. Hans Leo Cacdac kaupod ang Overseas Workers Welfare Administration (OWWA) ang amo nga mga tripulante.
Una na nga ginsug-alaw sang mga tinawo nagikan sa Embahada sang Pilipinas ang seafarers sa dungkaan sang Manama sa Bahrain matapos maluwas sa natabo nga insidente kun sa diin gindul-ong ang mga ini sang barko sang US Navy.
Kaangut sini, mas ginpasangkad pa sang DMW kag gobyerno ang pagpangita sa isa pa ka seafarer nga missing.
