Ginpabugal sang Department of Information and Communications Technology nga nangin epektibo ang ila preparasyon sa National kag Local Elections nga ginhiwat sang Mayo 12.
Suno kay Department of Information and Communications Technology Assistant Secretary Renato ‘Aboy’ Paraiso, resulta ini sang ila pagpakita sa publiko nga seryoso ang gobyerno sa pagbato sa mga pamahog sa seguridad sa eleksyon.
Dugang pa nga ginhatagan pagtamod ni Assistant Secretary Paraiso nga ang mga preparasyon nga ila ginhimo, pila ka mga layer sa system sang Commission on Elections, kag mga teknikal nga pamaagi amo ang nagpugong sa bisan ano pa nga pagtinguha sang mga malain nga luyag nga gub-on ang cyber security sang eleksyon.
Apang sa pihak sini, ginpakigbahin ni Assistant Secretary Renato Paraiso nga indi mapanginwala nga lapnagon sa gihapon tubtob subong ang fake news.
Suno sa iya, apisar nga wala sila sang may namonitor nga pamahog ukon hacking attempts sa sistema sang Commission on Elections, ang pagpalapta sang indi matuod nga impormasyon amo ang kaaway sang eleksyon.
Ginpabugal sang Assistant Secretary nga indi lang ini inisyatibo halin sa Inter-Agency Task Force sang gobyerno kundi nagalakip man ini sang nagkalain-lain nga mga organisasyon kag pribado nga sektor sa katilingban nga may pareho nga tinutuyo sa pagtapna sang mga pamahog may kaangtanan sa seguridad sa eleksyon.
