Patay ang 24-anyos nga babaye matapos ginlampusan sang martilyo sa ulo kag ginbuno sang iya ex-boyfriend sa sulod sang iya gina-arkilahan nga balay sa Cebu City.
Suno sa kapulisan, nagpalagyo ang 23 anyos nga suspetsado matapos ginhimo ang krimen, apang sang ulihi nagsungka na ini sa mga otoridad.
Gin-athag sang suspek nga magaselebrar kuntani sila sang biktima sang ila anniversary sa Miyerkules sang gab-i rason nga nagdala ini sang bulak kag tsokolate.
Apang wala ginbaton sang biktima ang iya regalo kag nagsiling nga may bag-o na ini nga nobyo.
Ginapahayag nga mas temprano pa ini gintuyo nga bun-on sang biktima kag ginpakita pa ang pilas nga iya naangkon sa iya kamot.
Suno sa landlady, nagkipagbulag ang biktima sa suspek bangud sa dalayon nga pagbaisay sang duha bangud sa anak sang biktima nga suno sa lalaki indi niya luyag.
Apang ginapahayag nga ginpili sang babaye ang iya bata kag ginbulagan ang suspetsado rason nga naakig ang naulihi.
Ipaidalum sa psychosocial intervention ukon debriefing ang bata matapos masaksihan ang krimen.
Narekober naman sang kapulisan ang kutsilyo kag martilyo nga gingamit sa krimen.
Sa subong, nagapangatubang sa kaso nga murder ang nasambit nga suspek.
