ROXAS CITY – Nagapabilin sa gihapon sa evacuation center ang 24 ka mga pamilya sa banwa sang Sigma kung sa diin ini ang nagikan sa mga barangay sang Mansacul, Guinta, Tawog kag Poblacion Sur.
Sa interview sang Bombo Radyo kay Mr. Thomas Lagulay Public Information Officer sang banwa sang Sigma, ginpahayag sini nga yara naman sa 636 ka mga pamilya ang apektado sang pagbaha.
Ini ang nagikan sa mga barangay sang Capuyhan, Cogon, Dayhagon, Guintas, Pagbunitan kag Barangay Tawog.
Mahibaluan nga ang mga balahaon nga lugar amu ang Barangay sang Acbo, Amaga, Bangonbangon, Capuyhan, Cogon, Dayhagon, Guintas, Mangoso, Mansacul, Matangcong, Matinabus, Mianay, Pagbunitan, Pinamalatican, Poblacion Sur, Poblacion Norte kag Tawog.
Mga dalan naman nga indi pa passable maagyan sang tanan nga sahi sang salakyan amu ang Barangay Bangonbangon, Cogon, Dayhagon, Guintas, Mangoso, Matangcong, Pagbunitan (Sitio Vito), Poblacion Norte (Sunshine), Poblacion Norte (Sitio Sugod) kag Barangay Tawog.
Suno kay Lagulay nga sa karun, naglapaw na ang tubig sa ila nga suba rason nga nagadugang ang numero sang mga evacuees.
Bangud sini, suspendedo sa gihapon ang klase sa tanan nga level sang buluthuan, subong man ang opisina sa public kag private sa nasambit nga banwa
Ginpahayag man ni Lagulay nga padayon ang ila pagmonitor sa lakat sang tyempo kag ang water level sa bulig sang Municipal Disaster Risk Reduction Management Office (MDRRMO).
Samtang, ginpanugyanan man suno diri ang tanan nga mga Punong Barangay nga magpabilin nga mangin alerto kag preparado subong man ang pagtsekyar sa ila mga nasakupan.
