Nagpaidalum sa Physical Fitness Test (PFT) ang 26 ka mga third-level Police Commissioned Officers (PCOs) ukon police colonels halin sa Police Regional Office 6 (PRO-6), sa Camp Gen. Martin Teofilo Delgado sang Agosto 7, 2025.
Ginalakipan ang mga senior officers sang regional staff, city kag provincial directors, mga hepe sang national support units, kag mga miyembro sang command group.
Sa interview sang Bombo Radyo kay Police Major Lailyn Sencil, Spokesperson sang PRO-6, ginpahayag ang nasambit nga aktibidad nagapakita sang commitment sang PRO-6 sa pagpaniguro sang physical health, wellness, kag operational readiness sang mga opisyal.
Suno sa iya, gin-evaluate ang mga Police Commissioned Officers paagi sa standardized exercises — kalakip ang push-ups, sit-ups, kag 12-minute run — agud matakos ang ila muscular strength, endurance, kag cardiovascular fitness nga importante sa epektibo nga leadership kag operasyon.
Samtang, ginhatagan man sang isa ka tuig nga grace period ang mga overweight personnel agud mag-improve sang ila physical fitness. Apang kon indi sila makapasar sa sulod sang ti-on, posible sila mag-atubang sang seryoso nga career consequences.
