Nagbungguanay ang tatlo tanan ka mga behikulo sa Arnaldo Boulevard, Roxas City.
Ginkilala ang na-imbolbado nga mga persona kanday alyas “Bryan”, 22-anyos, driver sang Honda Click nga motorsiklo kag residente sang Brgy. Agojo, Panay, Capiz, samtang ginkilala naman ang driver sang Honda Fit nga salakyan kay alyas “Diony” 31-anyos kag residente sang Brgy. Agtabo, Passi City, kag ang driver naman sang tricycle ang ginkilala kay alyas “Nick”, 60-anyos kag residente sang Brgy. Cogon sining syudad.
Sa nakuha nga impormasyon sang Bombo Radyo nagikan sa Roxas City PNP, ginapahayag nga aksidente nga nabungguan sang salakyan nga Honda Fit, ang motorsiklo nga Honda Click samtang naga-atras ini.
Magluwas sa Honda Click nga motorsiklo, nabungguan man ang isa pa ka tricycle nga ginamaneho ni Nick.
Bangud sa impact, natumba ang nasambit nga motorsiklo kag napilasan sa ulo ang drayber sini nga gilayon naman nga ginrespondehan sang mga katapo sang emergency response team. Nag-angkon naman sang damages ang tricycle kag salakyan apang nagapabilin naman nga yara sa istable nga kondisyon ang tagsa ka mga drayber sini.
Sa karon, nagapabilin pa nga nagapabulong sa ospital ang driver sang motorsiklo. Samtang, nagkasugot naman ang mga naimbolbado nga driver sang mga behikulo nga mag-settle nalang.
