Tatlo naman ka mga indibidwal ang nabiktima sang pagpanghold-up sa Barangay Sibaguan, sining syudad kagab-i.
Una nga nabiktima sang tatlo ka mga suspek ang duha ka mga pamatan-on nga yara sa kilid sang karsada kag nagahampang sang Mobile Legend (ML) sa ila mga cellphone.
Naglabay ang mga suspek sa diin nagaguyod sang motor ang isa.
Ila ginpamangkot ang mga pamatan-on kun diin sila mahimo makapatughong sang gasolina.
Kasunod sang pagsabat sang mga biktima ang pagtutuk sa ila sang kutsilyo kag pagkuha sang ila mga cellphone kasunod ang pagpalagyo sang tatlo ka mga suspek.
Nabiktima man sang mga suspek kagab-I ang anak sang barangay kagawad sang Barangay Sibaguan.
Ginpahayag ni Kagawad Rodel Arabia nga gina-saraduhan lamang sang iya anak ang ila metrohan ukon kontador sang tubig sang maagyan sang mga suspek.
Estelo sang tatlo nga magpamangkot kun diin sila mahimo makapatughong sang gasolina bangud nahubsan ang ila motorsiklo.
Kasunod sang pagsabat sang biktima ang pagtutuk man sa iya sang kutsilyo kag pagkuha sang iya cellphone.
Wala sang nahimo ang biktima kundi ihatag ang iya nga cellphone.
Ginabulubanta nga naga-edad sang 35-anyos pataas ang mga suspek.
Ginapatihan nga pamatan-on ang masami ginabiktima sang mga suspek, bangud ini lamang ang ila makaya nga indi makabato sa ila.
Ginpahayag pa ni Kagawad Arabia nga istrikto man nga ginapatuman ang curfew hour sa ila lugar.
Matandaan nga indi lamang mga residente sang Barangay Sibaguan ang nabiktima sang mga suspek bangud may nahinabo man nga pagpanghold-up kag pagkuha sang cellphone sa Barangay Lawaan kag Gabuan.
Naghinyo man ang kapulisan sa opisyales sa barangay nga parondahon ang ila mga tanod kun gab-I agud malikawan ang kasubong sini nga insedente.
Samtang padayon ang imbestigasyon sang kapulisan kag nagdihon na sila sang lihok agud makilala kag madakpan ang mga suspek.
