ROXAS CITY – Ginkumpirmar sang pinuno sang Provincial Disaster Risk Reduction and Management Office (PDRRMO) nga indi na required sa mga kabataan naga-edad 3-ka tuig panubo nga magsumiter sang negatibo nga resulta sang RT-PCR ukon Saliva test result kun ang ila ginikanan ang fully vaccinated na sa tion nga magapauli sa probinsya sang Capiz.
Sa interview sang Bombo Radyo kay Mrs. Judy Grace Pelaez, ginpahayag sini nga isa ini sa ginpaburan sang infectious disease doctor nga kakason ang pag-required sang RT-PCR ukon Saliva test sa mga nasambit nga age group bangud kadam-an sa ila ang wala man nagaguwa sa ila balay.
Sa mga indi naman bakunado nga ginikanan, kun magnegatibo ang resulta sang ila RT-PCR ukon Saliva test, indi naman pag-ipaidalom sa amu nga test ang ila kabataan.
Ini ang pila ka mga importante nga pagsulundan nga nakasaad sa EO No. 003 series of 2022 ni Capiz Governor Esteban Evan Contreras kun sa diin ginpaidalom sa Alert Level 2 ang probinsya sumugod Pebrero 16 tubtob 28, sini nga tuig.
Ginapahanumdom man ni Pelaez ang mga biyahero nga mag voluntary home quarantine sa sulod sang kapin lima ka adlaw sumugod sa ila pag-abot sa probinsya.
Sa pihak nga bahin, gindugang man sang PDRRMO head nga sa idalom sang Alert level 2 classification, ginapasugtan na ang face-to-face classes, apang nakadepende ini sa gihapon sa suhestyon sang DepEd.
Posible man suno diri ang face to face graduation, ina kun magapadayon sa pagnubo ang kaso sang COVID-19, kag depende sa mangin desisyon sang national government.
