Tatlo ang nabalhag nga napatay samtang tatlo ka iban pa ang pilason bangud sa paglaslas sang Severe Tropical Storm Crising kag sang Southwest Monsoon (Habagat), suno sa report sang National Disaster Risk Reduction and Management Council (NDRRMC) sini nga Domingo.
Duha sa mga napatay ang nagikan sa Northern Mindanao, kag isa sa Davao Region. Samtang, ang tanan nga napilasan ang nagikan sa rehiyon sang SOCCSKSARGEN.
Tatlo man ka indibidwal ang nabalhag nga missing sa Western Visayas. Suno sa NDRRMC, ginpaidalom pa sa beripikasyon ang mga report.
Base sa datos sang ahensya naglab-ot sa 370,289 ka tawo ukon 120,008 ka pamilya ang naapektuhan sang bagyo. Sa sini nga numero, 6,720 ka pamilya ukon 22,623 ka indibidwal ang yara sa evacuation centers samtang 5,287 ka pamilya 20,759 ka tawo ang temporaryo nga nagatinir sa guwa sang mga evacuation center.
Samtang naguwa na sa Philippine Area of Responsibility (PAR) ang Bagyo Crising sang Sabado, apang suno sa Philippine Atmospheric, Geophysical and Astronomical Services Administration (PAGASA), padayon sa gihapon nga magadala sang mga pag-ulan sa pila ka bahin sang pungsod ang Habagat.
