ROXAS CITY – Nagkalaguba ang tatlo ka mga sakayan-pandagat matapos aksidente nga nabungguan sang manugdungka nga Roro Vessel sa Culasi Port.
Suno kay Petty Officer 3rd Class Limuel Fernandez sang Philippine Coast Guard – Culasi, manugdungka na kuntani ang Super Shuttle Roro 22 sakay ang kapitan nga si Hermilito Mainit kag indi magnubo sa 30 ka mga tripulante sang may nagluntad nga engine trouble sa nasambit nga Roro rason nga nasalakay sini ang nakadungka nga tatlo ka mga sakayan sa pantalan.
Mahibaluan nga naggikan sa Batangas ang nasambit nga Roro nga may karga nga mga dalagkuan nga trucking.
Maswerte naman nga wala sang napilasan sa nasambit nga insidente.
Sa karon, suno kay Fernandez, ginahulat na lamang ang sabat sang pamunuan sang Super Shuttle para sa pag-negosyar sa tag-iya sang mga naguba nga mga sakayan.
