ROXAS CITY – Malipayon nga ginbaton sang 3,000 tanan ka mga tricycle drivers kag operators nagikan sa primero distrito kag Roxas City ang tig-P2,000 nga financial assistance sa idalum sang Fuel Subsidy Assistance Program nanday Congressman Howard Guinto sang Pinuno Partylist kag Board Member Jose Fulgencio ‘Pepe’ del Rosario.
Suno kay del Rosario, ang nasambit nga programa ang may pondo nga P6-M kun sa diin, 1,000 ka mga benepisaryo angnagikan sa Roxas City samtang ang nabilin nga 2,000 slots ang gintunga para sa mga kabanwahan sang Pilar, President Roxas, Maayon, Panay, Panitan kag Pontevedra.
Aminado ini, nga kulang ang nasambit nga pondo agud mahatagan sang tululupod ang mga miyembro sang TODA gani ginatinguhaan gid sang opisyal nga makalikom sang pondo agud madamo pa sang pumuluyo ang mahatagan sang bulig.
Mahibaluan, nagsugod sang Agosto 10 Huwebes ang tagtaganay sang assistance sa banwa sang Pilar, President Roxas, Maayon kag Panay samtang, kahapon naman Agosto 11 ang para sa Panitan kag Pontevedra.
Nalipay si del Rosario, nga apisar sa gamay nga kantidad nakahatag sang yuhom ang ila programa kag napahagan-hagan ang ginabatyag sang mga tricycle drivers kag operators sa pihak sang asud-asod nga pagtaas sa presyo sang produktong petrolyo.
