ROXAS CITY -Ginkumpirmar sang alkalde sang banwa sang Mambusao nga nakapauli na sa banwa sang Mambusao ang 34 ka mga mambusaonon nga masobra duha ka bulan nga nastranded sa probinsiya sang Aklan kag Isla sang Boracay.
Ginpahayag ni Mayor Leodegario Labao Jr. nga mismo ang lokal nga gobyerno sang Mambusao ang nagsugat sa 34 ka mga local strandees sa probinsiya Aklan kag Isla sang Boracay.
Apang ginpanindugan ni Labao nga hugot nga ginpaidalum sa maid-id nga health protocols antes ginpapauli sa tagsa ka mga panimalay agud liwat nga ipaidalum sang 14 day home quarantine.
Gindugang pa sang Alkalde nga gilayon man nga ginpaidalum sa covid-19 test pinaagi sa rapid testing ang mga locally stranded individuals sa diin lunsay nag negatibo ang mga ini sa covid-19 disease.
Suno pa sa kay Labao nga hugot ang patigayunon nga monitoring sa mga locally stranded individuals samtang ginapaidalum sa 14 day home quarantine.
Samtang ginpasalig man ni Labao nga magahatag sang nakaigo nga ayuda ang lokal nga gobyerno sang banwa sang Mambusao sa 34 ka mga local strandees samtang ginapaidalum sa 14 day home quarantine
