ROXAS CITY – Arestado ang isa ka 36-anyos nga lalaki matapos nga ginaalegar nagtuga sang kinagamo sa isa ka KTV bar sa Barangay Poblacion Ilawod, Pontevedra, Capiz.
Ginkilala ang suspek nga si Arnel Dayaday sang Barangay Libon, Panay, Capiz.
Base sa inisyal nga imbestigasyon sang mga kapulisan nga nakabaton sila sang tawag gikan sa isa ka waiter sang amo nga KTV bar nga may yara sang nagluntad nga kinagamo sa lugar.
Bangud diri, gilayon nga nagresponde ang mga pulis kag didto naabtan mismo nga nagauyat sang calibre .45 nga armas luthang ang nasambit nga suspek sa diin ginapahayag nga may yara ini sang kontra bangud lamang sa pag-request sang kanta sa videoke.
Sa karon, nakahunong na sa karsel sang Pontevedra Municipal Police Station ang suspek.
Samtang, natalana naman nga pasakaan sang panumbungon nga paglapas sa Republic Act 10591 ukon Comprehensive Law on Firearms and Ammunition si Dayaday.
