Napaslawan nga makapangawat ang 38-anyos nga lalaki nga ginapahayag kuhaon kuntani ang mga pagkabutang sa isa ka opisina matapos madakpan sang gwardya sa Primer de mayo st., Barangay 9, Roxas City.
Sa nakuha nga impormasyon sang Bombo Radyo nagikan sa Roxas City Police Station, ginapahayag nga nag-report sa ila talatapan ang gwardya nga ginkilala kay John Carlo Labanon, 23-anyos, residente sang Brgy. Majanlud Sapian, Capiz ang ginatudlo sini nga suspek nga ginkilala kay Ronald Arches, 38-anyos kag residente sang Brgy. 7 sining syudad.
Base sa panaysayon sang gwardya, nakita sini nga nagguwa ang suspetsado sa isa ka opisina nga bitbit ang isa ka wheelchair kag projector.
Bangud sini, gilayon sini nga gindakop ang suspetsado kag gilayon nga nagreport sa mga kapulisan agud madala sa istayon para sa nagakaigo nga imbestigasyon.
Sa karon, yara na ang nasambit nga suspek sa paghinakop sang Roxas City PNP para sa nagakaigo nga disposisyon.
