ROXAS CITY – Yara sa 4 ka persona ang ginapahayag yara sa likod sang nadula nga Kawasaki Bajaj 100 nagaduag itom sa Barangay Tuburan, Maayon Capiz.
Sa pagpakig-angut sang Bombo Radyo kay Hanelyn Castillo asawa sang tag-iya sang motorsiklo ginpahayag nga sadtong Hulyo 5, 2024 sang natabo ang insidente, nagduty sa binaylihan bilang CVO ang iya bana kaupod ang iya bata.
Pasado 11:00 sang gab-i kung sa diin magapauli na kun tani ang mga ini sang natalupangdan nga wala na sa ginparkingan ang ila motorsiklo rason agud gilayon nga ginpalab-ot sa talatapan sang ila barangay.
Suno kay Castillo, sa ila nga pagtsekyar sa closed-circuit television (CCTV) sa lugar gintulod sang duha ka persona ang ila motorsiklo samtang nauna na ang duha ka mga kaupdanan sini.
Bangud madulom ang lugar, indi klaro ang nawong sang mga hukugan nga persona apang nakasuksok ang mga ini sang puti, itom kag pula nga t-shirt kag posible padulong ang direksyon sa Barangay Manayupit ukon Bongbongan sa amu nga banwa.
Sa karun, padayon pa nga ginapangita nanday Castillo ang nasambit nga motorsiklo bangud dako ini nga bulig sa iya bata nga naga-eskwela.
Mensahe sini sa mga kawatan nga kon tani makabatyag man sang konsensya kag panawagan sini sa mga makakita gilayon nga ipahibalo sa ila ukon sa barangay kag mga kapulisan.
