ROXAS CITY – Apat ang patay nga ginalakipan sang tatlo ka mga NPA members kag isa ka soldado sa natabo nga enkwentro sa tunga sang militar kag New People’s Army sa Sitio Buyoron, Barangay Buenavista, Himamaylan City, Negros Occidental.
Ginkilala ang napatay nga soldado nga si Private First Class Joel Farinas sang Barangay Duran, Dumalag, Capiz nga nag-angkon sang patal nga pilas sa dughan kag paa.
Sa interview sang Bombo Radyo kay Captain Cenon Pancito III, spokesperson sang 3ID Philippine Army kag chief sang public affairs division nga nagapatigayon sang combat operation ang 62nd Infantry battalion sa lugar sang magsumalangay sila sang ginabulubanta 20 ka mga NPA members sang Central Negros Front.
Nagdugay sang 20 minuto ang pagbayluhanay sang luthang sang magtimbang nga bahin antes nagwithdraw ang mga rebelde.
Samtang ginkilala naman ang duha ka pilason nga sundalo nga sanday Sergeant Froilan Tosalem kag Corporal Oliver Porten.
Narekober sang militar sa lugar ang mga armas kag explosibo kalakip na ang 500 ka mga bala sang nagkalain lain nga armas, bala sang 40mm grenade launcher, M14 rifles, M6O machine gun, 30-meter nga electrical wire para sa anti-personnel improvised explosive device.
Padayon sa karon ang hot pursuit operation sang militar sa nagpalagyo nga mga rebelde.
