ROXAS CITY – Ginsabat ni Punong Barangay Jocelyn Asis sang Barangay Lawaan sining siyudad ang rason sang pagpahanugot sini nga paguhaon ang isa ka nagabusong nga babayi nga naka-quarantine sa Roxas City School for Philippine Craftsmen sa Barangay Lanot, Roxas City.
Matandaan nga nagkinagual ang mga LSI’s sa nasambit nga quarantine facility sadtong Disyembre 25 sang gab-i matapos ginaalegar nga nakakita sang aswang ang live-in partner sang isa ka LSI nga nagabusong sang 7 ka bulan.
Ginpahayag nga nakita mismo sang amo nga LSI ang duha ka mata sang ginaalegar aswang sa bintana.
Suno kay Asis nga nagpangibabaw sa iya ang pagpalangga sang isa ka iloy kabangdanan nga madasig ini nagdesisyon nga paguwaon na lamang ang nagabusong nga LSI.
Apang, ulihi na natukiban nga indi man mga residente sang syudad sang Roxas ang mag-live-in partner nga na-isyuhan sang Letter of Acceptance sang opisyal.
Magluwas diri, wala pa nakapaidalom sa swab test ang mga ini.
Dugang pa sini nga ulihi na nagpahibalo sa iya nga mga residente sang Estancia, Iloilo ang duha ka nasambit nga mga LSI.
Sa karon, nagapabilin sa puloy-an sang ila tiyo sa Barangay Lawaan sining siyudad ang duha ka mga LSI kag nagapaidalom sa 14-day quarantine period.
