ROXAS CITY – Pilason ang isa ka lalaki matapos nga ginlabo sang iya abyan sa Barangay Agambulong, banwa sang Jamindan.
Ginkilala ang biktima nga si alyas Patricio, 46-anyos kag residente sang Brgy. Maantol sa nasambit nga banwa, samtang ang ginapahayag nga suspek amo si alyas Yan2x, yara sa legal nga pang-edaron nga residente naman sang Brgy. Talon, Roxas City.
Sa inisyal nga impormasyon nagikan sa Jamindan Municipal Police Station, ginpahayag nga lunsay yara sa impluwensya sang makahulubog nga ilimnon ang nasambit nga mga persona sang tion nga natabo ang insidente kun sa diin may natabo nga pagbinaisay sa tunga sang biktima kag sang suspek rason nga hinali nalang ginlabo sang suspetsado ang biktima gamit ang isa ka patalom.
Nag-angkon sang pilas sa abaga kag likod ang biktima nga gilayon naman gindala sa Mambusao District Hospital sang iya mga himata para sa nagakaigo nga pagbulong.
Samtang madasig naman nga nagpalagyo sa lugar ang suspek matapos nakumiter ang krimen.
Sa karon, padayon ang hot pursuit operation sang mga kapulisan batuk sa nasambit nga suspetsado.
