Nakuha sang 49-anyos nga atleta nga si Egmond Molina ang iya ika-10 nga Guinness World Record matapos niya mabutong ang isa ka bus gamit lang ang iya liog.
Ginhigot ni Molina ang isa ka kalat sa iya liog kag ginbutong ang bus nga nagabug-at sang 21,737 pounds sa kalayuon nga 65 feet.
Ginkumpirmar ini sang Guinness World Records bilang bag-o nga world record para sa pinakamabug-at nga salakyan nga nabutong gamit ang liog.
Nalabwan sini ang rekord nga gin-uyatan ni Dmytro Hrunskyi sang 2024.
Suno kay Molina, mabudlay ang iya eksperyensya bangud kinahanglan niya kontrolon ang pagginhawa samtang ginabira ang mabug-at nga bus.
Kabahin man sa iya mga rekord ang pinakamadasig nga 20-meter bus pull gamit ang isa ka tudlo, tram pull gamit ang unto, kag pinakamadasig nga pagpabuto sang hot water bottle.
