ROXAS CITY – Nagapangatubang sang kaso nga paglapas sa RA 10591 ukon Comprehensive firearms ammunition regulations act in relation to Comelec gun ban ang 52-anyos nga lalaki matapos nga nagpinalupok sang armas-luthang sa San Jose Village, Barangay Tiza, Roxas City.
Matandaan, ginkilala ang persona kay Don Besana, kag residente sang nasambit nga barangay.
Sandig sa Roxas City PNP, nga may nag-report sa ila nga nagapinalupok si Besana sang iya armas-luthang kag sang ila ini ginpadulungan narekober sa posesyon sang amu nga persona ang isa ka unit sang .45 calibre nga armas-luthang may 7 ka mga bala, 2 ka deformed ammunition kag 8 ka mga baseyo sang amu nga armas.
Mahibaluan nga yara sa impluwensiya sang makahulubog nga ilimnon si Besana.
Sa karon, nagapabilin sa karsel sang Roxas City PNP ang nasambit nga akusado para sa nagakaigo nga disposisyon.
