ROXAS CITY – Patay ang 56-anyos nga manugtanom sang luy-a, matapos nga ini ginhold-up kag ginluthang-patay sang wala pa matumod nga suspek, sa Barangay San Juan, Jamindan, Capiz.
Ginkilala ang biktima kay Jerry Mauricio Lorenzo, residente sang nasambit nga barangay.
Sandig sa nakuha nga impormasyon sang Bombo Radyo sa Jamindan Municipal Police Station, nagaguwa sa ila imbestigasyon nga nagikan si Lorenzo sa iya talamnan sang luy-a kag nagapauli na kuntani sa ila puloy-an, sang ginbanggaan ini sang wala makilala nga suspek ukon mga suspek kag may nagluntad nga komosyon.
Diri kag ginluthang ang biktima gamit ang ginaalegar .45 calibre nga armas-luthang.
Nadiskubrehan man nga wala na ang dala nga kapin P18,000 nga kuwarta sang biktima, nga posible gintaban sang suspek.
Sa karon, ginapadalman sang mga kapulisan ang pagtumod sa pagholdap kag pagpatay sa nasambit nga mangunguma.
