ROXAS CITY – Ginkuha sang 20 ka wala makilala nga mga kalalakinhan ang sais mil nga mga manok nga nagabalor sang P700,000 sa isa ka poultry farm sa Sitio Magalan, Barangay Sagrada Familia, banwa sang Dumarao, sa probinsiya sang Capiz.
Ginsulod ang poultry farm kag gingapos ang kamot kag tiil sang bantay nga si Jay-Ar Detorio 25-anyos.
Nagaguwa sa imbestigasyon sang Dumarao PNP nga tulog si Detorio sa iya hulot sa nasambit nga farm sang pukawon sang duha ka lalaki nga nakamaskara kasunod ang pagtutuk sang armas.
Samtang ginagapos ang kamot kag tiil sang helper nabatian sini ang pagsulod sang duha ka trak sa poultry farm kag ang gahud sang mga manok nga ginkarga sa trak.
Matapos mahatagan katumanan ang plano sang mga suspek, gilayon man sila nga nagbiya sa lugar.
Nakita na lamang sang manager sang poultry farm ang helper nga nakagapos sa iya pag-abot sa farm sa diin gilayon ini nga nagpakig-angut sa punong barangay nga amo ang nagreport sa insedente sa mga pulis.
