ROXAS CITY – Isa ka hero’s welcome ang nagsug-alaw sa walo ka gold medalist nga mga Capizeño taekwando jins sa ila nga pag-abot sa Roxas City airport matapos ang madinalag-on nga pagpasakup sa 2017 Napa International Taekwando championship sa Napa City, California, USA.
Matunog nga singgitan sang mga tawo nga nagbantay sa pag-abot sang mga taekwando jins nga lunsay yara sa elementarya kag sekondarya sang makita nga nagpanaug na sa eroplano ang mga ini kaupod ang ila nga coach nga si Mr. Joven Venancio.
Magluwas sa walo ka mga bulawan nga medalya nga gikan sa poomsae kag kyurogi nagdala man pauli ang mga taekwando jins nga sanday Thea Mae del Rosario, Merishka Rainne Ablao, Franzinn Francisco, Sean Falcis, Nicole Villarina, Zachary Te Aguirre, Mikko Micheal Regala kag Gwyneth Nichole Andaya sang dugang nga tatlo ka silver kag apat nga bronze medals.
Suno naman kay Thea Mae del Rosario, nakakuha sang 2 ka gold medals sa poomsae kag kyurogi nga dream come true sa iya ang makahampang sa luwas sang pungsod kag malab-ot ang handum nga makahatag sang kadungganan indi lamang sa Capiz kundi sa Pilipinas.
Gin-ako man ni Del Rosario nga daku ang nabulig sa ila nga training ang protected scoreboard gear nga ginpahulam sang Capiz provincial government, bangud ini man ang ginagamit sang ila mga kasambuwa nga gikan sa iban nga nasyon.
Samtang malipayon naman si coach Joven Venancio sa nangin kadalag-an sang mga capizeño taekwando jins.
Suno diri nga sa pihak nga nag-adjust ang mga bata sa malamig nga klima, apang natigayon nila sa gihapon nga mangibabawsa nasambit nga kumpetisyon.
Nahibaluan nga nagalab-ot sa 1,500 ka mga players gikan sa Amerika, Brazil, Korea, Thailand kag Nigeria ang nagpasakup sa nasambit nga event.
