ROXAS CITY – Nagaisahanon lamang nga nagapuyo ang isa ka 80-anyos nga babaye nga nasapawan patay sa Lomboy Street, Barangay Tiza Roxas City kaina sang aga alas 9:10 Hulyo 22.
Matandaan nga ginkilala ang biktima kay Emily Malic Quiros kag residente sang nasambit nga lugar.
Base sa impormasyon nagikan sa Roxas City Component Police Station, nakabaton sang tawag ang kapulisan nagikan kay Barangay Kagawad Dax Alovera sang amu nga lugar kag ginapahayag nga may yara sang isa ka residente nga masobra isa na ka semana nga wala makaguha sa iya puluy-an.
Bangud sini, gilayon nga ginpadulungan sang katapo sang RCPS ang amu nga lugar agud tsekyaron kag didto na nakit-an nga
nagakaya sa may bahin sang kusina kag wala na sang kabuhi si Quiros.
Mahibaluan nga isahanon nga nagapuyo ang amu nga senior citizen sa iya puluy-an, bangud ginapahayag yara sa Manila ang mga kabataan sini.
Ginpalab-ot naman sang otoridad ang amu nga hitabo sa iya mga kabataan.
Sa karun yara na ang bangkay ni Quiros sa isa ka punerarya sining syudad kag natalana nga dal-on sa iya puluy-an.
Samtang, nagapati naman ang pamilya sini nga wala sang foul play nga natabo sa amu nga insidente bangud wala man sang pilas nga nakit-an sa iya lawas.
