ROXAS CITY -Nagdangat sa 90 ka mga indibidwal ang naglapas sa curfew hours sa bug-os nga probinsiya sumugod nga ginpatuman ang enhanced community quarantine (ECQ) agud malikawan ang paglapta sang coronavirus disease 2019.
Ginpahayag ni Police Col. Julio Gustilo Jr., provincial director sang Capiz Police Provincial Office (CPPO) sa nasambit nga numero 10 ang mga salawayon nga nadakpan sa Roxas City sini nga bulan sang Abril kag ang iban ang gikan sa kabanwahanan.
Sa 90 ka mga violators, 87 ang lalaki kag tatlo ang babaye, pito ang mga menor de edad kag 83 ang yara na sa legal nga pang-edaron.
Pinakamadamo nga naglapas sa curfew hours ang sa premier distrito sang Capiz nga may 75 kag 15 lamang sa segundo distrito.
Pila sa mga rason sang mga mga violators kun sila ang madakpan nga na-alangan sila sa pagpauli matapos nagkadto sa isa ka lugar kag ang iban yara sa impluwensiya sang makahulubog nga ilimnon sa ila nga pagpauli.
Suno kay Gustilo nga sa mga 1st offender nga madakpan, ila ini ginahatagan sang warning kag ginarekord ang pangalan, agud kun liwat sila madakpan, may igahatag na nga sanction sa ila.
Ginkumpirma ni Gustilo nga sa pagsugod sang curfew hour sa probinsiya, may napulo na ka mga violators nga ginpasakaan sang panumbungon sang kapulisan, bangud sa ila nga pagbatu sa mga otoridad kag pagpamalibad nga magsunod sa ginahambal sang mga pulis.
Ginpasalamatan man sang opisyal ang mga barangay tanod/CVO bangud daku ang ila nga nabulig sa kapulisan sa pagpatuman sang curfew hour sa ila nasakupan nga barangay.
Pag-abot naman sa border security checkpoint, suno kay Gustilo nga kinahanglan ang superbisyon sang PNP ukon AFP kag indi lamang mga tanod ukon opisyales sa barangay.
Hugot man nga ginapatuman ang pagtsekyar sa mga indibidwal nga indi residente sang amo nga lugar.
