Nagnubo sa 5.3% ang unemployment rate sa pungsod sang nagligad nga bulan sang Agosto, halin sa 6% sang Hulyo Suno sa Philippine Statistics Authority (PSA).
Katumbas ini sa 2.77 milyon nga mga Pilipino nga wala sang trabaho sang Agosto, nga mas manubo kumpara sa 3.14 milyon nga indibidwal sang Hulyo.
Samtang, nagnubo man ang underemployment rate sa 11.9%, ukon katumbas sang 5.90 milyon nga mga Pilipino nga nagapangita pa sang dugang nga oras sa trabaho ukon dugang nga palangitan-an.
Mas manubo ini kumpara sa 12.9% ukon 6.33 milyon nga mga Pilipino nga kulang ang ila kita ukon oras sang pagtrabaho sang Hulyo.
Samtang, naglab-ot sa 94.7% ang employment rate sa pungsod, nga katumbas sang 49.79 milyon nga mga Pilipino nga may trabaho ukon pangabuhian sang Agosto.
